Lihlehliselwe umhla weshumi elinesihlanu kweyeDwarha ityala elijongene nendoda etyholwa ngokubulala abantu abalishumi elinesibhozo kwinto ngoku eyaziwa njenge Massacre yaseLusikisiki.
Esi sehlo senzeke kumakhaya amabini akwisitalato esinye.
Ishumi elinesihlanu lamaxhoba ibingabafazi.
Umkomishinala wamaPolisa eMpuma Koloni uLieutenant General Nomthetheleli Mene uthe, “Ndiqinisekile ukuba sifumene umntu ochanekileyo. umntu.”
“Kuba uphando lusaqhuba kodwa ndingatsho phandle ukuba bangaphezulu kwesithathu abarhanelwa esibajongileyo, singaquki lo, isenokuba baninzi.
IKumkani yaMampondo uDaluxolo Sigcau ubonakalise inkxaso kumalungu osapho kule nkundla.
“Ndilapha kwinkundla kamantyi yengingqi yaseLusikisiki ukuze ndimamele kwaye ndibone ukuba ngenene kuzakwenzeka ntoni kwaye ndibone nalo mnumzana ekurhaneleka ukuba nguye obulale abantu abangaka,” itshilo ikumkani.
“Kukho uloyiko olukhulu kuba abahlali bale ndawo, iNgobozana ngokukodwa, abonwabanga ngenene, bayoyika kuba le nto yenzekileyo apho iyothusa ngokwenene.
“Ndicinga ukuba ukuthembana kufuneka kubuyiswe ngokusebenzisana namapolisa nokusebenzisa inombolo esetyenziswayo xa kuxelwa ulwaphulo-mthetho.
Amapolisa abongoze nabani na onokuba nolwazi olunokuthi ancedise kuphando ukuba atsalele inkokeli yeqela ku-082 301 7762. Olu lwazi lungadluliselwa nakule nombolo iCrime Stop ku-08600 10111.
Inkosi yabahlali baseLambasi Amampondo uMthuthuzeli Mkwedini uphulukene nomntakwabo kwimbubhiso kwaye umele amalungu osapho angaphaya kweshumi aza kungcwatywa ngoMgqibelo.