Ebetyatyadula ngokunga ubotshwe emnweni, ezikhankanya zonke iindawo athe waxelenga kuzo.
USizwe Kupelo(48), namhlanje ubevele kwiNkundla yamatyala orhwebo, kuGompo.
Uyavuma ukuba akanalo nelinjani ikhephe-khepe, gxebe iqwaku-qwaku leMatriki, ngaphandle nje kweli lomgunyathi, futhi akanayo nenjani i-‘Degree.’
Namhlanje ubephekwa esophulwa ngemibuzo, kwaye angajongana neminyaka eli-15 ethothoza eziseleni.
Isicelo sakhe sokuchithwa kwamatyala wakhe phantsi kwalomthetho; (Section 174 of Criminal Procedure Act), sikhatyelwe kude.
Ityala lizakuqhuba de lifikelele esiphelweni. Ngoku kulindeleke ukuba ingqina likarhulumente liqabele emkhumbini ngomso umhla we-16 kweyeKhala 2026.
Uthi xa ethetha lento yakhe, yena usebenzile kwisikhululo sosasazo i-Unitra Community Radio, eMthatha.
Ubeyintatheli yokuqala eyancokola nexhego laseQunu, utata uNelson Rholihlahla Mandela, kwaye uwunyengezele noMhlobo Wenene fm iindaba abezichola-chola ngokwakhe.
Hayi maan!, zininzi ezizinto lo tata azingca ngazo kwelibholo lakhe lokuqhuba imisebenzi emikhulu engenanto esandleni. Mandiyeke apho