Liye lagqekreza izulu lezandla ngomhla we-13 kweyeKhala 2026, kwilali yaseSebeni, ngakwaMncane, kwisithuba sentsimbi yesihlanu(17:00) emalanga.
Abazibonele ngamehlo bathi kuye kwashwabana izibindi, kurhwaqela amathumbu endodeni, yehle ngomnqonqo imikhwinya, umchamo ucad’ udada lwentlalo enzima! usehlisa imilenze ukuyoqhina ezinzwaneni, neengqathane zabe zisithi ndilapha.
Le ndedeba nekudala likhunkquzwa emoyeni igama layo, ukho nakwinkonzo yoshishino lwezithuthi zikawonke-wonke, kulaa mmandla waseNgqeleni.
Izolo uthe gqi ngamapolisa esike iphiko kwiqegu lakhe, efake umcinga wematshisi emlonyeni, nca! izaza likaMandoza, edlala ingoma kaR. Kelly, le ithi; ‘I Believe I Can Fly,’
Wee ntla!!! ngabakwantsasana, nabaphuma kwiCandelo le-TRT, baye bamcela nje kakuhle ukuba amise iqengu elo ubehamba ngalo ecaleni.
Ingxelo iqhuba ithi, uye wawagwexa, ewalaxaza amapolisa, esithi noba ningandibanisa nelophisi, ndihleli ndidiniwe kukuxikixwa yimpilo.
Uthe akuba egqibile ukuthetha loo mazwi, wakhupha ingandla-ngandla yakhe yomkhono weKati, oluhlobo lwe-‘R5 rifle,’ evulela kuqala ngezulu lezandla, kwatshawuza imibane, ingumenye-menye wento.
Elinye lamapolisa uphantse walitywina impandla ngembumbulu, lisinde ngokulambisa.
Amapolisa awaphozisanga maseko, asabela ngeyawo imikhono yeKati, amdlakaze ubuchopho, wabetha ezika R. Kelly, wayakuncamisa, iingqathane zebhokhwe namagade engawaplitanga.
Uye warhubuluza, ebhinyoloza ngeqham-qhamana lesisu oku kwenyoka ibaleka utshaba, izithende nenqentsu zajonga ngqo! eZulwini kuloHerode noGoliath.
Kubeyiloncwina ingaqhelekanga, wawudontsa umxhelo, ebhedulula namahlo, wakhupha umoya wokugqibela, kanti sele elusabele ubizo lwangasentla kwimbizo yaphezulu, engakhethi balala lamntu.
Sibhala elinqaku nje ngalomzuzu, umoya wakhe uthe ncaa! ngasekunene kukaThixo, uYise onamandla onke, umdali wezulu nomhlaba;
Kodwa sona isibhuku-bhuku somzimba sisathe khunubembe usizi lwento kwizikhenkcezisi zemizi yogcino-zidumbu, silinde lo mhla wokuculwa kwamagugu elilizwe.
Lo mfana ubetyholwa, ekwarhanelwa ngokuqweqwedisa iinqwelo-mafutha ezihambisa imali(CIT), kwelaa cala laseMqanduli.