Iinkonzo zothutho lwabafundi kulo lonke elaseMpuma Koloni ziphinde zaqala ngokusesikweni ngoLwesithathu, umhla weshumi elinesithandathu kweyeDwarha ngo-2025 kulandela isivumelwano phakathi kukarhulumente wephondo nababoneleli ngeenkonzo zezothutho.
Inkulumbuso yaseMpuma Koloni uOscar Mabuyane usiqinisekisile esi sigqibo ngethuba ethetha noonondaba ngoLwesibini umhla weshumi elinesihlanu kweyeDwarha kwiziko leeNkokheli zeMfundo iMandla Makupula eMonti. Le ndibano ibihlanganise abathathi-nxaxheba abaphuma kwisebe lezothutho eMpuma Koloni, ibhunga lezoteksi loMzantsi Afrika (SANTACO) kweli phondo kunye neshishini leebhasi ngeenjongo zokusombulula ingxaki yokuphazamiseka kweenkonzo okubangelwe kukulibaziseka kweentlawulo zabasebenzi bezothutho.