ISebe leMfundo esiSiseko likuqinisekisile ukufunyanwa kolwaphulo-mthetho oluthe lwenzeka ngethuba lokumakishwa kwamaphepha eemviwo zokugqibela zematriki.
Ulwaphulo-mthetho lwachongwa ngeenkqubo zolawulo lomgangatho wangaphakathi wesebe kunye nokubeka iliso.
Isithethi seli Sebe uTerrence Khala uqinisekise ukuba uMphathiswa uSiviwe Gwarube uzakuthetha noluntu namajelo eendaba malunga nesi sehlo kunye namanyathelo aza kuphunyezwa ukukhusela imfezeko yeemviwo zika-2025.
“UMphathiswa weMfundo esiSiseko, uNksz Siviwe Gwarube, ngomso, uLwesine womhla weshumi elinanye kweyoMnga, uza kuthetha noonondaba kwindibano engxamisekileyo kulandela ukuchongwa kokwaphulwa kwemigaqo yeemviwo ngethuba lokumakisha iimviwo zeSatifikethi seMatriki sikaZwelonke (NSC) ngo-2025.”