Indoda yaseMpuma Koloni ebanjwe kulandela ukudubulana namapolisa eLaudium ePitoli, yasilahla isicelo sayo sebheyile ngethuba ivele enkundleni ngoLwesine.
IGunyabantu lezoTshutshiso lithi uAyanda Nombebe oneminyaka engamashumi amabini anesibini (22) nophuma kwilali yaseKhalankomo eMpuma Koloni, uvelile kwinkundla kamantyi yaseAtteridgeville nalapho ejongene namatyala amaninzi aquka amatyala amathandathu okubulala.
Izityholo zokubulala zinxulumene nokubhubha kwabo batyholwa ukuba wayehamba nabo, ababulawa kukudubulana namapolisa awayelandela umkhondo wokuphangwa kwemali ecetyiweyo.
Isithethi seNPA, uLumka Mahanjana, uthe uNombebe, ukwajongene namatyala amabini okuzama ukubulala, amahlanu okufunyanwa nemipu engekho mthethweni, nokuba neembumbulu, nelokwenza iyelenqe lokuphanga ngeemeko ezimanyumnyezi.
Kutyholwa ukuba wabalekela kumzi okufutshane ngethuba lokudubulana kweyoMdumba, nalapho wabanjwa.
UNombembe usavalelwe de avele kwakhona kwinkundla yengingqi ngomhla wamashumi amabini anesithandathu kweyoKwindla.