Nangona ungekacaci umhla wolonyulo loomasipala oluzayo, amaqela ezopoliko sele ewaqalile amalungiselelo.
Oku kucace xa iqela lezopolitiko elitsha ekuthiwa yi-United for Change liphehlelela ngokusesikweni inkqubo yalo entsha eliza kuyisebenzisa njengokuba likhangela ooceba abatsha elizweni lonke ngeCawa edlulileyo.
Lo mbutho omtsha wezopolitiko uphehlelelwe kwinyanga edlulileyo emva kokusungulwa ngamaqela amathathu aquka iRise Msanzi, iGood Party neBuild One South Africa ngelizama ukudibanisa amandla ukuze akwazi ukufumana inkxaso ebhetele ngomhla wolonyulo oluzayo.
Amaqela amaninzi kwezopolitiko eMzantsi Afrika akhetha abantu ngaphakathi xa efuna ooceba abaza kuba koomasipala. Iqela elitsha lona liyivulile inkqubo yalo. Lithi wonke umntu ofunayo mafake isicelo.
Umbutho mtsha uthembise ngelithi iza kuchonga abantu ngokufanelekileyo futhi abawufaneleyo umsebenzi. Phakathi kwezinto eziza kujongwa emntwini yimbali yakhe yokusebenzela uluntu ngaphezulu kwepolitiki.
Abaphathi banethemba lokufumana abagqatswa boosodolophu kwiphulo labo lokukhangela iinkokeli ezintsha phambi kolonyulo. Kuyiwa kulonyulo olukunyaka ozayo kuphihliphihli koomasipala abaninzi eMzantsi Afrika ngenxa yokuqhwalela kokuhanjiswa kweenkonzo nokuwa kolawulo.
Ingxelo ekhutshwa kanye ngonyaka nguMphicothizincwadi isoloko iqulethe iindaba ezimbi ezibonisa ukusetyenziswa ngendlela engekho semgaqweni imali kaRhulumente.
Kule mibutho mithathu, yiGood Party yodwa enethuba elide ikhona. IRise Mzansi neBuild One South Africa beziqala ukungenela ulonyulo kwelikazwelonke obelubanjwe kunyaka ophelileyo.
Ngethamsanqa lawo akwazile ukufumana izihlalo ezimbalwa atsho aqukwa nakurhulumente wobumbano okhokelwa yiAfrican National Congress ephuncukene nesininzi okokuqala ukusukela ngonyaka ka1994. UMmusi Maimane uthe inkqubo abayisebenzisayo iza kuzixhaya iziqhwaka zepolitiki.
“Sixoxisana nabantu abazimeleyo abakhe bangenela ulonyulo ngaphambili. Sizama ukuthi kubemi beli lizwe masihlangane ngoba unyulo oluzayo lubaluleke kakhulu ukuba singaya siziintsalu kulo,” utshilo uMmaimane.
USosiba weGood Party, uBrett Herron, uxelele amaxelo eendaba ukuba umntu ngamnye abamkhethileyo uza kuvunywa ngabantu ahlala kuyo. “Asibafuni abantu abakhangela indlela yokuzityebisa ngepolitiki,” utshilo uHerron.
Inkqubo yokukhethwa kwabantu iza kuqala kwinyanga ezayo. Kukhangeleka iyindlela aza kungena ngayo amaqela adibeneyo kwiindawo angazange afikelele kuzo.