Kuthe qabu ebantwini abaninzi abalandela umbhoxo emva kokuba uMzantsi Afrika uphumelele umdlalo obalulekileyo.
Amabhokobhoko aquthise iFrance ngo32-17 emdlalweni wovavanyo obunzima ngeyona ndlela eStade de France, eParis, kubusuku boMgqibelo odlulileyo.
Emva kokufuthanyiselwa kakubi yiFrance eye kwixesha lokuphumla ihamba phambili – iintshatsheli zehlabathi zibuyele ebaleni zingamameli futhi zaqinisekile ukuba ziyibethela ukuba ingaphindi ikrokre iFrance ebisakhalela okwenzeka ngonyaka ka2023.
Impumelelo yesibini yoMzantsi Afrika ibifana nombulelo kuSiya Kolisi obedibanisa ikhulu lemidlalo yovavanyo kwiqela lesizwe namashumi amahlanu emidlalo yovavanyo engumqeqeshi weqela lesizwe uRassie Erasmus.
La madoda aphuma kwiphondo laseMpuma Koloni enze indima ebonakalayo kwimpumelelo ezuzwe nguMzantsi Afrika nakwicala lokuguqula umdlalo wombhoxa oxhaswa ziintlanga zonke ngoku. Bobabini, uErasmus noKolisi, bayibulele inkxaso yabantu baseMzantsi Afrika emva komdlalo eParis.
Bekunzima emdlalweni ngoba Amabhokobhoko adlale ixesha elininzi eqhwalela emva kokuba kukhutshwe uLood de Jager ngekhadi elibomvu ngenxa yokudlala kwakhe kakubi umdlali weFrance. Kodwa Amabhokobhoko alilwe ngoba ibilusuku olubalulekileyo kuwo kakhulu.
“Sibulela abantu ekhaya eMzantsi Afrika ahleli kwade kwasebusuku besibukele. Thina sidlalela bona nolizwe lethu, uMzantsi Afrika,” utshilo uRassie Erasmus – ungqondongqondo womqeqeshi owoyikwa kwihlabathi lonke embhoxwe. URassie wenze umbulelo kuSiya ngokwamkela ukukhutshwa emdlalweni.
Noxa ibixakile iFrance kwisigaba sokuqala – kodwa umqeqeshi uvakalise ukoneliseka ngumsebenzi owenziwe ngabadlali. “Abadlali abaqale umdlalo bawathobile amandla weFrance kwisigaba sokuqala.
“Abangene kwesesibini bathathe ngokugqibezela. Ndicinga ukuba wonk umntu uyenzile indima yakhe. Abantu bathi abadlali bethu badala – kodwa mna ndithi balumkile.
“Besifuna ukuwuphumelela kakubi umdlalo wanamhlanje. Kunzima ukudlala apha eFrance – kodwa abadlali abadala nabaqeqeshi bakwazile ukuze neqhinga,” utshilo umqeqeshi emva komdlalo.